வினோ மதிவதனி - கொட்டகலை.
நமது மோப்ப சக்தியை விட நூறு மடங்கு நுகரும் சக்தி கொண்டவை தேனீக்கள். சில மைல்கள் தொலைவில் இருந்தே குறிப்பிட்ட பூவின் வாசனையை அறிந்து கொள்ளும் திறமை கொண்டவை தேனீக்கள்.
நாய்களின் மோப்ப சக்தியைக்கொண்டு வெடி குண்டுகளை, போதை மருந்துகளை கண்டுபிடிக்க பயன்படுத்துகிறோம். அதுபோல கூர்மையான மோப்ப சக்தி கொண்ட தேனீக்களையும் நாம் பழக்கி பயன்படுத்தலாமா என்ற சிந்தனையின் விளைவுதான் தேனீ பயோசென்ஸார். போர்த்துகீஸ் டிசைனர் சுஸானா ஸோரெஸ் இதை வடிவமைத்தார். இப்போது தேனீக்களும் மருத்துவர்களின் உதவியாளராக இருக்கின்றன. சுஸானா ஸோரெஸ் தற்போது லண்டன் சவுத்பேங்க் யுனிவர்சிட்டியில் முதுநிலை பேராசிரியை ஆக இருக்கிறார்.
ஸோரெஸ் இதற்கென பிரத்யேகமாக கண்ணாடி குடுவை ஒன்றை உருவாக்கி இருக்கிறார். அதனுள் அடுக்கடுக்கான கோளங்கள் உள்ளன. ஊது துளை வழியாக செலுத்தப்படும் காற்றை நுகரும் தேனீக்கள் நெருங்கி வருவதையும் அல்லது விலகி ஓடுவதையும் வைத்து அளவீடுகள் நிர்ணயிக்கப்படுகின்றன. நுகரும் தேனீக்களுக்கு தண்ணீர் கலந்த சுவீட்டுகள் கொடுத்து ஊக்குவிக்கப்படுகின்றன. சோதனையின் பிற்பாடு அவை வளர்ப்பு தேன் கூடுகளுக்கு விடுவிக்கப்படுகின்றன.
மனிதனை பாதிக்கும் காசநோய், நுரையீரல், தோல், கணைய புற்றுநோய், மலேரியா, டெங்கு, சக்கரை நோய்களை பழக்கப்பட்ட தேனீக்கள் கண்டறிகின்றன.
நோய்களை கண்டுபிடிப்பதற்காக மட்டுமே இவற்றை நான் உருவாக்கவில்லை, மனிதன் இயற்கையோடு இயைந்து இருக்கவேண்டிய அவசியத்தை, நம்மால் உணரமுடியாத இதுபோன்ற சாத்தியக்கூறுகளை வெளிப்படுத்துவதுமே எனது நோக்கம் என தெரிவிக்கிறார் ஸோரெஸ்.
இது சோதனையின் முதல் கட்டம் மட்டுமே மேம்பட்ட கருவியை இனிமேல் தான் கண்டுபிடிக்கப்பட வேண்டும் என்கிறார் அவர்.
