அவுஸ்திரேலிய அணிக்கு எதிராக இம்மாதம் நடைபெறவுள்ள மூன்று போட்டிகள் கொண்ட 20க்கு 20கிரிக்கெட் தொடருக்கான 16பேர்கொண்ட அணியை இலங்கை கிரிக்கெட் (17) உத்தியோகபூர்வமாக அறிவித்துள்ளது.
பாகிஸ்தானில் மூன்று போட்டிகள் கொண்ட 20க்கு 20தொடரை 3-0என வெற்றிக்கொண்ட இலங்கை அணி, எதிர்வரும் 27ம் திகதி ஆரம்பமாகவுள்ள அவுஸ்திரேலிய அணிக்கு எதிரான 20க்கு 20தொடருக்காக அங்கு பயணமாகவுள்ளது.
அவுஸ்திரேலிய தொடருக்காக செல்லவுள்ள 16பேர்கொண்ட இலங்கை அணியின் வீரர்கள் விபரம் வெளியாகியுள்ளது. வெளியிடப்பட்டுள்ள இந்த அணியில், பாகிஸ்தான் தொடரிலிருந்து அதிகமான மாற்றங்கள் மேற்கொள்ளப்படவில்லை.
பாகிஸ்தான் சென்ற இலங்கை 20க்கு 20அணியிலிருந்து நான்கு மாற்றங்கள் மாத்திரமே மேற்கொள்ளப்பட்டுள்ளன. விக்கெட் காப்பாளர்களான சதீர சமரவிக்ரம, மினோத் பானுக, சகலதுறை வீரர் லஹிரு மதுசங்க மற்றும் துடுப்பாட்ட வீரர் அஞ்செலோ பெரேரா ஆகியோர் அணியிலிருந்து நீக்கப்பட்டுள்ளனர்.
அதன்படி, 20க்கு 20அணியின் தலைவராக மீண்டும் லசித் மாலிங்க நியமிக்கப்பட்டுள்ளதுடன், பாகிஸ்தான் அணிக்கு எதிரான தொடரில் அணிக்கு தலைமை தாங்கிய தசுன் ஷானக அணியில் இடம்பெற்றிருக்கிறார். இவ்வாறு, லசித் மாலிங்கவுடன், குசல் மெண்டிஸ், குசல் பெரேரா மற்றும் நிரோஷன் டிக்வெல்ல ஆகிய நான்கு வீரர்கள் அவுஸ்திரேலிய அணிக்கு எதிரான அணியில் இடம்பெற்றுள்ளனர்.
பாகிஸ்தானின் பாதுகாப்பு சூழ்நிலை காரணமாக மேற்குறித்த வீரர்கள் குறித்த தொடருக்கு செல்ல மறுத்திருந்த நிலையில், குசல் மெண்டிஸ் மாத்திரம் உபாதை காரணமாக பாகிஸ்தான் தொடரில் பங்கேற்கவில்லை. எனினும், இப்போது உபாதையிலிருந்து குணமடைந்துள்ள அவர், உடற்தகுதியை நிரூபித்துள்ள நிலையில், அவுஸ்திரேலிய அணிக்கு எதிரான குழாத்தில் இணைக்கப்பட்டுள்ளார்.
நியூசிலாந்து அணிக்கு எதிரான 20க்கு 20தொடருக்கான அணியிலிருந்து நீக்கப்பட்டிருந்த அஞ்சலோ மெத்திவ்ஸ் மற்றும் திசர பெரேரா ஆகியோருக்கு இந்த தொடரிலும் வாய்ப்பு கிடைக்கவில்லை என்பது குறிப்பிடத்தக்கது.
இலங்கை அணி
லசித் மாலிங்க (அணித் தலைவர்), தனுஷ்க குணத்திலக்க, குசல் மெண்டிஸ், அவிஷ்க பெர்னாண்டோ, செஹான் ஜயசூரிய, குசல் பெரேரா, தசுன் ஷானக, ஓசத பெர்னாண்டோ, நிரோஷன் டிக்வெல்ல, வனிது ஹசரங்க, பானுக ராஜபக்ஷ, லஹிரு குமார, லக்ஷான் சந்தகன், கசுன் ராஜித, இசுரு உதான, நுவன் பிரதீப்
